Óskemende Oktıabr sý ótkizý arnasy jańǵyrtyldy
50 myńnan astam adamdy aýyzsýmen qamtamasyz etetin Oktıabr sý qoımasyn rekonstrýktsııalaý jobasy mejelegen ýaqytta iske asyryldy. Bul týraly turǵyndar aldynda esep bergen Óskemen qalasynyń ákimi Jaqsylyq Omar málimdedi. Jıynǵa aımaq basshysy Danıal Ahmetov te qatysty.
«Óskemendikterdi bıyl jaǵymdy ózgerister kútip tur. Máselen, Krasına kentindegi, Menovnoe jáne Ahmer aýyldaryndaǵy sýmen jabdyqtaý jelileri, Menovnoe aýyly men Traktornaıa kóshesindegi káriz jelileri qaıta jańartylady. Sondaı-aq shahar turǵyndarynyń qajettiligin qamtamasyz etý úshin jańa Óskemen sý ótkizý arnasynyń qurylysy júrgizilýde», – dedi Jaqsylyq Omar.
Onyń aıtýynsha, ótken jyly «Jumyspen qamtýdyń jol kartasy-2020» baǵdarlamasy aıasynda qalada 7,5 myń jumys orny qurylyp, 31 mlrd teńgeden astam somaǵa 114 joba iske asyrylǵan. 305 kópbalaly otbasy, 127 jetim bala men halyqtyń basqa da áleýmettik osal toptaryndaǵy 317 adam baspanaly boldy. 63 bilim berý mekemesi jóndelip, jeti mektep ǵımaraty tirek-qımyl apparaty buzylǵan balalarǵa beıimdeldi.
Onlaın formatta ótken esep berý kezdesýine qatysqan qala turǵyndary birqatar ózekti máselelelerdi kóterdi.
«23 shaǵyn aýdan turǵyndary joldar asfalttalyp, kóshelerdiń jaryqtandyrylǵanyna qýanyshtymyz. Biraq aýdanǵa ortalyqtandyrylǵan jaryq júıesi tartylmaǵan. Sonyń saldarynan azamattar jekemenshik uıymmen kelisimshartqa otyrýǵa májbúr. Al elektr energııasynyń baǵasy óte qymbat. Aýdanǵa qashan ortalyqtandyrylǵan jaryq tartylady?» - dedi turǵyndardyń biri.
Jaqsylyq Omar 23 shaǵyn aýdandy elektrmen jabdyqtaýdyń jobalyq-smetalyq qujattamasy ázirlenip jatqanyn, 2021 jyly qarajat bólinse júzege asyrylatynyn jetkizdi. Jalpy joba boıynsha 430 abonent, ıaǵnı 1290 adam jaryqpen qamtamasyz etiledi. Jelilerdiń jalpy uzyndyǵy – 41,8 shaqyrym.
Kezdesý sońynda oblys ákimi ótken jyly Óskemen qalasynda atqarylǵan jumystarǵa oń baǵa berdi.
«Óskemende byltyr áleýmettik jobalar qarqyndy iske asty. Ásirese, kópbalaly, az qamtylǵan otbasylardy qoldaý boıynsha birshama jumys atqarylǵan. 2020 jyly baspanaly bolǵandardyń sany artqany qýantady. Bul qarqyn bıyl da jalǵasý kerek», - dep qorytyndylady Danıal Ahmetov.
