Óskemende mylqaý áıel órt tutanǵanda eshkimdi kómekke shaqyra almaǵan
ÓSKEMEN. QazAqparat - Búgin Óskemendegi Qabanbaı batyr kóshesinde bes qabatty úıdiń páteri órtke orandy. Kórshiler terezeden qyzyl jalyndy kórgen soń birden órt sóndirýshilerdi shaqyrǵan, dep habarlaıdy QazAqparat tilshisi.
Keıin anyqtalǵandaı, zardap shekken áıel qulaǵy estimeıtin mylqaý bolǵandyqtan kómekke shaqyra almaǵan.
Tótenshe jaǵdaılar departamentiniń málimetinshe, kelip jetken órt sóndirýshiler shuǵyl iske kirisken. Alaıda, arnaıy tehnıkanyń jumysyna esik aldyndaǵy metall qorshaý kedergi jasapty.
«Órtengen páterdiń terezesinen bir áıeldi kórdik. Ony tez arada qutqarmasaq, jaǵdaı ýshyǵatyny anyq edi. Sondyqtan úshıindi satyny qurama ádispen burýǵa týra keldi. 5-qabatqa birinshi bolyp kóterilgen órt sóndirýshi Dıas Moldajanov áıeldi sabyrǵa shaqyryp, tynyshtandyrýǵa tyrysty. Sóıtip oǵan syǵymdalǵan aýamen jumys isteıtin arnaıy apparatty kıgizdi», - deıdi shuǵyl kezekshi Bolat Nurdybaev.
Dıas áıeldiń esin jıǵyzyp jatqanda mamandandyrylǵan jasaqtyń órt sóndirýshisi Aıdar Qapyshev oǵan kómekke keldi. Ekeýi zardap shekken áıeldi úıge tirelgen baspaldaqpen tómen túsirip, jedel járdem dárigerlerine tapsyrdy. Jedel járdem japa shekken turǵyndy №1 qalalyq aýrýhanaǵa alyp ketti.
Osy aralyqta jalynǵa oranǵan úıden 30 turǵyn evakýatsııalandy. Ony - balalar. Oqıǵa ornynda 5 tehnıka jáne jeke quramnan 20 órt sóndirýshi jumys istedi. Órt bir saǵatta tolyq sóndirildi. Aldyn ala boljam boıynsha, eki sebep bar: otpen jumys istegende abaı bolmaý jáne elektr jabdyǵynyń apattyq rejımi.
Aıta ketý kerek, bul - mereke kúnderi Qabanbaı batyr kóshesinde bolǵan ekinshi tótenshe jaǵdaı. Munyń aldynda 21 naýryz kúngi órtten bir áıel kóz jumǵan bolatyn.
Avtor: Lıýdmıla Malko
