Óskemende monsha kesheni otqa orandy
ÓSKEMEN. QazAqparat - Óskemen qalasynda monsha kesheni órtendi, dep habarlaıdy QazAqparat oblystyq tótenshe jaǵdaılar departamentine silteme jasap.
Búgin, 6 qyrkúıek tańǵy saǵat 5 shamasynda Zataevıch kóshesinde ornalasqan monsha kesheninen órt shyqty. Býlaný bólmesindegi jıhaz, qaptama jáne demalys bólmeleri otqa oranǵan.
Órt sóndirýshiler kelip jetkenge sheıin qyzyl jalyn 100 sharshy metr aýmaqty sharpyp úlgergen.
Ǵımaratta órt tutanǵan kezde ishinde qonaqtar bolmaǵan, oqıǵa týraly qutqarýshylarǵa monsha ákimshisi men kúzetshi habarlaǵan.
Qyzyl jalyndy aýyzdyqtaýǵa 8 tehnıka men 27 adam jumyldyryldy. Órt sóndirýshilerdiń júıeli ári jedel is-áreketiniń arqasynda tańǵy 06:37 kezinde tilsiz jaýdyń beti qaıtty.
Qazirgi boljam boıynsha, órttiń shyǵýyna elektr jabdyqtarynyń apattyq rejımi sebep bolǵan. Qalalyq tótenshe jaǵdaılar basqarmasy qala turǵyndaryn órt qaýipsizdigi talaptaryn qatań saqtaýǵa shaqyrady.
