Óskemende mobıldi baılanys pen ınternet durys ustamaıtyn segiz aýmaq bar

ÓSKEMEN. KAZINFORM – Óskemen qalasynda áli kúnge deıin mobıldi baılanys pen ınternet sapasy tómen aýdandar bar.

Qalanyń negizgi bóligi uıaly baılanyspen qamtylǵanymen, keıbir aýmaqtarda áli de baılanys durys ustamaıdy. Máselen, 25-shi shaǵyn aýdan, Sheshek aýmaǵy, Samsonovka jáne Novotroıtsk eldi mekenderinde ınternet jıi úzilip, baılanys nashar ustaıdy.

- Internet birde ustap, birde ustamaıdy. Keıde tipti qońyraý shalýdyń ózi qıyn. Sondaıda baılanys ustaıtyn jer izdep, syrtqa shyǵýǵa týra keledi, - deıdi Novotroıtsk turǵyny.

ShQO tsıfrlandyrý jáne arhıvter basqarmasynyń málimetinshe, Óskemende baılanys sapasy tómen segiz aýmaq bar.

- Qalada 5G mobıldi baılanysy úshin «Mobaıl Telekom Servıs» JShS-niń 32 bazalyq stantsııasy ornatylǵan. Baılanys sapasyn arttyrý maqsatynda olardyń sanyn 2025 jyldyń sońyna deıin 62-ge deıin arttyrý josparlanyp otyr, - dedi basqarma basshysynyń orynbasary Arnur Saparǵalıev.

Baılanys sapasyn jaqsartý jumystary tek Óskemende emes, búkil óńir boıynsha júrgizilip jatyr.

Qazir Shyǵys Qazaqstandaǵy 357 eldi mekenniń 235-i ınternetpen qamtamasyz etilgen, bul 706 myń adam nemese oblys halqynyń 97 paıyzy. Jyl sońyna deıin taǵy 56 aýylǵa ınternet qosý josparlanǵan.

Al qalǵan 66 eldi meken 2027 jylǵa deıin kezeń-kezeńimen ınternetpen qamtylady.

Eske salsaq, osyǵan deıin elimizde jyl basynan beri 23 myńǵa jýyq ınternet alaıaqtyǵy tirkelgeni habarlanǵan.