Óskemende Mıshlen juldyzyn ıelengen aspazdar frantsýz taǵamdaryn daıarlaýdy úıretedi
ÓSKEMEN. QazAqparat - Óskemenge álemdik deńgeıdegi aspazdar kele jatyr, dep habarlaıdy QazAqparat tilshisi.
Shara 29-30 naýryz kúnderi Óskemendegi «Serebro» meıramhanasynda ótedi. Frantsııadan attaı qalap aldyrǵan eki maman da - shef-aspaz laýazymyna ıe «Mıshlen juldyzynyń» jeńimpazdary.
Philippe Rocheron men Gengo Vaca óskemendik meıramhana aspazdaryna jergilikti ónimderden frantsýz taǵamdaryn daıarlaýdy úıretpek. Meımandar jergilikti aspazdar arasynda baıqaý ótkizip, úzdik atanǵan adamǵa Parıjdegi aspazdyq mektepterdiń birinde tegin bilim alýǵa joldama beredi.
«Mıshlen juldyzyn» aspazdyq ónerdiń «Oskar» júldesi deýge bolady. Álemde atalmysh juldyzdyń 800-ge jýyq ıesi bar.
Uıymdastyrýshylar aspazdar men restoratorlardy atalmysh master-klasqa qatysýǵa shaqyrady. Barlyq suraqtar boıynsha 8/7232/24-82-67 telefony arqyly habarlasýǵa bolady.
