Óskemende meteojaǵdaıdyń kúrdelenýine ne sebep

ÓSKEMEN. KAZINFORM – Bul týraly Óskemen qalasynda qalyptasqan qolaısyz meteorologııalyq jaǵdaılarǵa qatysty ótken brıfıng barysynda aıtyldy.

Qala ákimi Almat Aqyshovtyń aıtýynsha, jelsiz kúnderde kásiporyndarmen ózara is-qımyl jolǵa qoıylǵan.

- Qolaısyz meteojaǵdaılar kezinde óndiris oryndary shyǵaryndylardy azaıtý sharalaryn qabyldaıdy. Búginde Óskemende avtokólik sany da kóbeıip ketti. Jylytý maýsymy bastalǵan kezde jer úıler kómir jaǵa bastaıdy. Aýa sapasynyń nasharlaýyna bul faktorlar da áser etip otyr, - dedi ol.

Ekologııalyq monıtorıng derekteri boıynsha, aýadaǵy zııandy shyǵaryndylardyń negizgi kórsetkishteriniń kópshiligi boıynsha belgilengen normatıvten asyp ketý faktisi anyqtalǵan joq.

ShQO Bilim basqarmasynyń basshysy Qýat Oqasovtyń aıtýynsha, qolaısyz meteorologııalyq jaǵdaı qalyptasqan kezde mektepterdiń qashyqtan oqytý formatyna kóshý algorıtmi ázirlenedi.

- Aýa sapasynyń nasharlaýy, kóktaıǵaq nemese kúnniń kúrt sýytýy syndy sebepterge qatysty sabaqty onlaın formatqa kóshirý sheshimin únemi bilim bólimderi qabyldaıdy. Mysaly, Altaı qalasynda aýa temperatýrasy -45 gradýs bolyp, sabaqtar toqtatylsa, bul sheshim Zaısan aýdanyna esh qatysy joq. Bilim bólimderi bizge aqparat usynady, sonyń negizinde olarmen birge tıisti sheshim qabyldaımyz. Keshe «Qazgıdromet» RMK-nan Óskemende 23 qazan saǵat 20:00-den 24 qazan saǵat 20:00-ge deıin ekinshi dárejeli qolaısyz meteojaǵdaılar kútiletini týraly aqparat aldyq. Osylaısha, qalalyq bilim bólimi sabaqty qashyqtan ótkizý formatyna aýystyrý jaıly sheshim qabyldady. Bizde belgili bir algorıtm bar, biraq onyń bir kemshiligi - ákimdik pen bilim bólimi arasyndaǵy ózara árekettestiktiń bolmaýy. Qala ákimi sheshim qabyldaýǵa quqyly, alaıda bilim bólimi oǵan emes, oblystyq bilim basqarmasyna baǵynady. Aldaǵy ýaqytta bul algorıtmdi jetildiremiz, - dedi ol.

Eske salsaq, osyǵan deıin Óskemende aýa sapasynyń nasharlaýyna baılanysty oqýshylar mektepke barmaǵany habarlanǵan.