Óskemende merekelik sharanyń sońy jappaı ýlanýǵa ulasty

ÓSKEMEN. KAZINFORM — Óskemen qalasyndaǵy dámhanalardyń birinde ótken merekelik sharaǵa kelgender jappaı jedel ishek ınfektsııasymen aýrýhanaǵa tústi.

ShQO Aqparat ortalyǵynyń habarlaýynsha, naýqastarda jedel gastroenterıtke tán belgiler baıqalǵan. Atap aıtqanda, júrek aıný, qusý, dene qyzýynyń kóterilýi, ishtiń aýyrýy jáne ish ótý.

Birneshe adam aýrýhanaǵa jatqyzylyp, qalǵandary ambýlatorııalyq em qabyldaýda.

Mamandar epıdemıologııalyq tekserýdi bastap ketti. Taǵamdar men sýdan synama alyndy.

Aýyrǵan jáne olarmen baılanysta bolǵan adamdardan saýalnama júrgizilip, zerthanalyq tekserýler uıymdastyryldy.

ShQO Densaýlyq saqtaý basqarmasynyń málimetinshe, aýrýhanaǵa jatqyzylǵandardyń basym bóliginiń jaǵdaıy ortasha aýyr dep baǵalanǵan.

— Eshkimniń ómirine qaýip tónip turǵan joq. Naýqastarǵa qajetti em júrgizilip, jaǵdaılary ońalyp keledi. Ambýlatorııalyq em qabyldap jatqan patsıentterdiń jaǵdaıy qanaǵattanarlyq, olar dárigerlerdiń baqylaýynda, — delingen aqparatta.

Eske salsaq, osyǵan deıin Daǵystanda 300-den astam adam sýdan ýlanǵany habarlanǵan.