Óskemende merdigerdiń joldy sapasyz jóndep jatqany anyqtaldy

ÓSKEMEN. KAZINFORM – Óskemen qalasynda arnaıy tekserý barysynda merdigerdiń joldy sapasyz jóndep jatqany anyqtaldy. 

Qala joldaryn jóndeý sapasyna jan-jaqty monıtorıng jasalyp jatyr. Sybaılas jemqorlyqqa qarsy qyzmettiń jumys toby, «Jol aktıvteri sapasynyń ulttyq ortalyǵy» RMK Shyǵys Qazaqstan oblysy boıynsha fılıalynyń ókilderimen birlesip, Abaı dańǵyly boıyndaǵy «Dına» bazarynan Internatsıonalnaıa kóshesine deıingi jol ýchaskesine ınspektsııalyq tekserý júrgizdi. 

Sonyń barysynda zerthanalyq taldaý júrgizý úshin asfaltbeton jabynynan synamalar alyndy. 

«Synamalardy aýystyrý, qujattamany túzetý nemese nátıjelerdi joıý sııaqty saraptamalar júrgizý kezindegi yqtımal buzýshylyqtardy boldyrmaý úshin, sybaılas jemqorlyqqa qarsy qyzmet synamalardy zerthanaǵa birge jetkizdi. Zerthanalyq synama alynǵan asfaltbeton úlgileriniń sýmen qanyǵý jáne qaldyq keýektilik kórsetkishteri boıynsha normatıvtik qujattardyń talaptaryna sáıkes kelmeıtinin kórsetti. Osyǵan baılanysty tapsyrys berýshi men merdiger uıymǵa anyqtalǵan kemshilikterdi joıý týraly nusqama jiberildi», - dep habarlady Antıkordan.