Óskemende memleketke 430 mln teńge salyq tólemeı qoıǵan eki adam 5 jylǵa sottaldy

ÓSKEMEN. QazAqparat - Shyǵys Qazaqstan oblysynyń eki turǵyny iri kólemde salyqtan jaltarǵany úshin 5 jylǵa sottaldy, dep habarlaıdy QazAqparat.

Qarjy monıtorıngi komıtetiniń Shyǵys Qazaqstan oblysy boıynsha ekonomıkalyq tergeý departamenti ShQO eki turǵynyna qatysty iri kólemde bıýdjetke salyq tóleýden jaltarý faktisi boıynsha tergeýdi aıaqtady.

Tergeý barysynda olardyń 2017 -2018 jyldar aralyǵynda jalǵan kásiporyndardyń jalǵan esepshotyn paıdalana otyryp, QQS salyq aınalymyn jáne satyp alynatyn taýar, jumys jáne qyzmetter esebine jatqyzylatyn somany tómendetý, deklaratsııalarǵa tabystar men shyǵystar týraly jalǵan málimetterdi engizý, salyq salýdyń basqa obektilerin jasyrý arqyly memleketke 430 mıllıon teńge kóleminde salyq tólemegeni anyqtaldy.

Óskemen qalasy №2 sotynyń úkimimen olar Qylmystyq kodekstiń 28-babynyń 2,3 -b., 245 - babynyń 1,3 bóligimen kináli dep tanylyp, 5 jylǵa bas bostandyǵynan aıryldy.

Sottyń sheshimimen prokýrordyń memleketke 430 mıllıon teńge kólemindegi shyǵyndy óndirip alý týraly azamattyq talap aryzy tolyǵymen qanaǵattandyryldy.