Óskemende mektepterdegi aqsha jınaý máselesin talqylady
«Óskemen ákiminiń orynbasary Olga Býlavkınanyń aıtýynsha, jemqorlyq derekterin azaıtý úshin mektepterde qamqorshylyq keńesteri qurylǵan.
Atalmysh uıymdar áleýmettik jáne ekonomıkalyq mindetterdi atqarýdy kózdeıdi. Túsip turatyn qarjyny keńes músheleri talqylap, únemi esep jasalyp otyrady», - dedi O. Býlavkına.
Oblystyq Sybaılas jemqorlyqqa qarsy is-qımyl ulttyq bıýrosy departamentiniń basshysy Sergeı Potanın bul máselege qatysty ózgeshe pikirdi ustanatynyn aıtty.
«Qamqorshylyq keńes - formaldy túrde ashylǵan uıym. Onyń jumysy ashyq kórsetilmeıdi. Balamasy retinde demeýshilik shot ashyp qoıýǵa bolady. Onyń áreketin býhgalterııa, qarjy mekemesi tikeleı qarap otyrady. Іshki memlekettik aýdıt departamenti memlekettik satyp alýlardy baqylaı alady. Barlyǵy aıqyn. Bul normaǵa aınalýy tıis», - dedi sybaılas jemqorlyqqa qarsy vedomstvonyń sheneýnigi.
Aıta ketý kerek, búginde Óskemendegi 6 mektepte arnaıy shot ashylǵan. Alaıda jemqorlyq qaýpin azaıtýǵa múmkindik jasaldy ma, joq pa - ol jaıynda aıtýǵa áli erte.
Keńes kezinde Sergeı Potanın oqýlyqtarǵa, keńse qural-jabdyqtaryna, jóndeý jumystaryna aqsha jınaý zańsyz ekenin jáne qolma-qol aqsha berý jemqorlyq qaýpin tóndiretinin aıtyp ótti.
Otyrystyń sońynda Memlekettik qyzmet jáne sybaılas jemqorlyqqa qarsy is-qımyl agenttigine qarasty oblystyq departamenttiń basshysy Janna Qabdoldaqyzy ShQO Bilim basqarmasyna barlyq mektepterden zańdy túrde shottar ashyp, ata-analardan qolma-qol aqsha alýǵa tyıym salýǵa usynys bildirdi.