Óskemende mekteptegi esepshiler 120 mln teńge jymqyrdy degen kúdikke ilikti
ÓSKEMEN. KAZINFORM – Óskemen qalasyndaǵy mektep esepshileri 120 mln teńge jymqyrdy degen kúdikke ilikti. Qazir tergeý amaldary júrgizilip jatyr.
Shyǵys Qazaqstan oblysy boıynsha Sybaılas jemqorlyqqa qarsy qyzmet Óskemendegi mekteptiń 2 esepshisine qatysty qylmystyq isti tergep jatyr.
«Jambyl atyndaǵy daryndy balalarǵa arnalǵan oblystyq mamandandyrylǵan mektep-gımnazııa-ınternatynyń eki esepshisi aldyn ala sóz baılasyp 120 mıllıon teńge kólemindegi bıýdjet qarajatyn urlady degen kúdikke ilikti», - dep habarlady Antıkordan.
Tergeý málimetterine súıensek, esepshiler bes jyl boıy óz shottaryna joǵarylatylǵan jalaqy men basqa da tólemderdi aýdaryp otyrǵan.
Eske salsaq, osyǵan deıin ShQO-daǵy aýrýhana memlekettik satyp alý portalynda ádeıi qatelik jiberip kelgeni habarlanǵan.
