Óskemende mektep salý úshin 8 úı súriletin boldy

Óskemen qalasynda mektep salý úshin 8 jer úı súriletin boldy, dep habarlaıdy QazAqparat tilshisi.

Qala irgesinde ornalasqan Babkına Melnıtsa shaǵyn aýdanyndaǵy Tımofeev kóshesinde 300 oryndyq mektep salynbaq. Alaıda «Jaıly mektep» jobasy boıynsha boı kóterýi tıis bilim ordasyna tıesili ýchaskede 8 jer úı tur. Ákimdik sol úı ıelerimen kelissóz júrgizdi.

Mektep qurylysy respýblıkalyq bıýdjetten qarjylandyrylady. Jobaǵa qol qoıylyp, merdiger anyqtaldy. Ol qazir bolashaq qurylys alańyn qorshaýǵa kirisip ketken.

«Mektep salynatyn aýmaq ishinde 12 jer telimi bolsa, onyń ishindegi 8 turǵyn úıdi súrip tastaý josparlanǵan. Talap boıynsha aınalada 50 metrdeı qashyqtyqta birde-bir turǵyn úı bolmaýy kerek. Úı ıeleri aqshalaı ótemaqyǵa kelisti. Al jer telimderiniń ıelerine №25 turǵyn úı alqabynan teńdeı jer telimi beriledi», - deıdi Óskemen qalalyq jer qatynastary, sáýlet jáne qala qurylysy bóliminiń basshysy Erkin Turarov.

Onyń aıtýynsha, jańa bilim ordasy elektrmen emes, gazben jylytylady.