Óskemende mektep pen sot ǵımaratynan jarylǵysh zat tabylmady
ShQO Polıtsııa departamenti baspasóz qyzmetiniń málimetine súıensek, 6 aqpanda saǵat 14.18-de Óskemen qalasyndaǵy mektepterdiń birinde jarylǵysh zat qoıylǵandyǵy týraly habar túsken. Mamandandyrylǵan qyzmetter dereý oqıǵa ornyna keldi. Bilim ordasynan qyzmetkerler men oqýshylardy evakýatsııalaý júrgizildi. Mektepti qaraý jáne tekserý nátıjeleri boıynsha qandaı da bir qaýipti zattar tabylǵan joq.
Sondaı-aq osy kúni saǵat 15:52-de Óskemen qalasy Qaısenov kóshesinde ornalasqan sot ǵımaratyna bomba qoıylǵandyǵy habarlanǵan. Sol jerge de arnaıy qyzmet mamandary jetip, halyqty qaýipsiz jerge kóshirdi. Tekserý júrgizý kezinde eshqandaı jarylǵysh zat tabylmady.
«Atalǵan faktiler boıynsha QR QK-niń 273-babymen sotqa deıingi tergeý amaldary bastaldy. Qazirgi ýaqytta jarylǵysh zattar týraly jalǵan habarlaǵan adamdardy anyqtaý boıynsha is-sharalar júrgizilýde. Mundaı quqyq buzýshylyqtyń qoǵamdyq rezonans týdyratyn jáne onyń yqtımal saldaryn eskere otyryp, ol úshin 5 jylǵa deıingi merzimge bas bostandyǵynan aıyrý túrindegi qylmystyq jaýapkershilik kózdelgenin eskertemiz», - delingen habarlamada.
Eske salsaq, osyǵan deıin Óskemende sotqa jáne mektepke bomba qoıylǵany týraly habar túsip, halyq evakýatsııalanǵanyn habarlaǵan edik.