Óskemende mektep oqýshylary qaladaǵy smogqa baılanysty qashyqtan oqıdy

ASTANA. KAZINFORM — Qalada úshinshi kún qatarynan qolaısyz meteorologııalyq jaǵdaı (jel joq) saqtalyp otyr. Osyǵan baılanysty 16 aqpanda 0–11 synyp oqýshylarynyń barlyǵy (birinshi jáne ekinshi aýysym) onlaın formatta bilim alady, dep habarlaıdy Kazinform agenttiginiń tilshisi.

Qalalyq bilim bóliminiń málimetinshe, sheshim uzaq ýaqy jeldiń soqpaýyna jáne qolaısyz ekologııalyq ahýalǵa baılanysty qabyldanǵan. Lastanýdyń ekinshi dárejeli qolaısyz meteojaǵdaıy kezinde zııandy zattar aýa qabatynyń tómengi bóliginde jınalyp, balalardyń densaýlyǵyna keri áser etýi múmkin.

— Ekinshi dárejeli qolaısyz meteojaǵdaı saqtalýyna baılanysty 16 aqpanda sabaqtar qashyqtan uıymdastyrylady. Oqý protsesi keste boıynsha onlaın formatta jalǵasady, — dep naqtylady vedomstvo.

Mektepterde tsıfrlyq bilim berý platformalary paıdalanylady, oqýshylar men ata-analarmen keri baılanys qamtamasyz etilgen. Bılik bul shara ýaqytsha ekenin jáne balalardyń densaýlyǵyna tónýi múmkin qaýiptiń aldyn alý maqsatynda qabyldanǵanyn atap ótti.

Buǵan deıin Óskemen qalasyna ne sebepti qysta jıi tuman túsetinine qatysty ákimdik ókilderi jaýap berdi.