Óskemende mektep oqýshylary arasynda kópkúndik velojarys bastaldy
ÓSKEMEN. KAZINFORM – Óskemende dástúrli «Qazaqstannyń mektep oqýshysy» atty kópkúndik velojarys bastaldy. Baıraqty báseke Ulttyq ǵylymı-praktıkalyq dene tárbıesi ortalyǵynyń bastamasymen bıyl 56-ret uıymdastyrylyp otyr.
Jarys bıyl Shyǵys Qazaqstan oblysynyń ortalyǵy – Óskemen qalasynda ótip jatyr. Dástúrli doda jas veloshabandozdardyń tájirıbesin shyńdap, bolashaq chempıondardy anyqtaýǵa múmkindik beredi. Bıylǵy jarysqa elimizdiń 11 óńirinen kelgen 120-ǵa jýyq sportshy qatysyp jatyr.
Saıysta 2008–2009 jyldary týǵan jáne odan kishi jastaǵy jasóspirimder baq synaıdy. Kópkúndik jarys 7 kezeńnen turady. Baǵdarlamaǵa jekeleı jáne toptyq jarystar engizilgen. Qatysýshylar 25, 40, 80, 84 jáne eń uzaq 90 shaqyrym qashyqtyqtarda ózara myqtyny anyqtaıdy.
- Bul jarys – jas sportshylardyń kúsh-jigerin shyńdap, sheberligin arttyratyn mańyzdy sporttyq alań. Jyl saıyn elimizdiń túkpir-túkpirinen jınalǵan talantty jasóspirimder osy dodada óz múmkindikterin kórsetip, tájirıbe almasady. Osyndaı jarystardyń arqasynda bolashaqta halyqaralyq arenalarda Qazaqstannyń kók týyn jelbiretetin sportshylar ósip shyǵady dep senemiz, - deıdi Ulttyq ǵylymı-praktıkalyq dene tárbıesi ortalyǵynyń jetekshi sarapshysy Nurbergen Nurlyhasymuly.
Aıta keteıik, dástúrli doda Shyǵys Qazaqstan oblysy ákimdiginiń jáne «Qazaqstan velosıped sporty federatsııasy» respýblıkalyq qoǵamdyq birlestiginiń qoldaýymen ótkizilip jatyr.
