Óskemende mazýt kólshigi paıda boldy
ÓSKEMEN. QazAqparat - Óskemenniń qurylys materıaldary aýdanynda mazýt kólshigi tabyldy, dep habarlaıdy QazAqparat tilshisi.
Ekologııalyq qaýipsizdik ortalyǵynyń mamandaryna atalmysh aqparatty qala turǵyny Oksana Ilıýshkına jetkizgen. Itin seıilge alyp shyqqan áıel ıttiń qyńsylaǵan daýsyn estıdi. Daýys shyqqan jerge bettegen ol eni 5 metr, uzyndyǵy 15 metrden asatyn kólshiktiń ortasynda belýardan batyp qalǵan ıtti kóredi. Ol mazýt bolyp shyqqan. Janýardy áýpirimmen shyǵarǵan Oksana Ilıýshkına ıtke jabysqan mazýtty ózdiginen ketire almaǵan soń veterınarlyq emhanaǵa ótkizipti.
«Dárigerler ıtti eki kún boıy jýdy. Onyń denesin mazýttan aryltý úshin eki quty sabyn, 5 lıtr kúnbaǵys maıy ketti» - deıdi Oksan Ilıýshkına.
Mazýt kólshigine balalar da túsip ketýi múmkin ekenin oılaǵan Oksana Ekologııalyq qaýipsizdik ortalyǵynyń mamandaryna habar beripti. Ekologtar kólshikten synamalar alyp, zertteýde. Atalmysh keleńsizdik týraly tıisti oryndarǵa jazbasha habar jiberilgen.
«Kólshiktiń mańaıynda avtomobıl joly joq. Sondyqtan ony kólikpen ákep tógýi ekitalaı. Al sál bıikte temirjol ótip jatyr. Mazýt sol poıyz vagondarynan tógilgen bolýy múmkin. Kólshiktiń uzyndyǵy 15 metrden asady. Ortasy óte qoıý. Mańaıda jer úıler kóp. Oqystan bala tússe, qaıǵyly oqıǵa tirkelýi múmkin. Ázirge tereńdigin anyqtaý múmkin bolmaı tur» - deıdi ekologııalyq qaýipsizdik ortalyǵynyń mamany Anatolıı Fılıpov.
Onyń aıtýynsha, Óskemenniń aýmaǵynan osymen úshinshi ret tehnogendik kólshik tabylyp otyr. Alǵashqy eki kólshik Zaşıta aýdany men «Týrıst» qonaqúıiniń artynan tabylǵan.
«Zaşıta aýdanyndaǵy kólshikpen tıisti organ ókilderi aınalysyp jatyr. Al «Týrıst» qonaıqúıiniń artyndaǵy kólshiktiń qorshaǵan ortaǵa zııansyz ekeni anyqtaldy» - deıdi ortalyq ókili.
