Óskemende masaıǵan er adam bıik kópirden ózenge sekirip ketti
NUR-SULTAN. QazAqparat - Óskemende kópirden ózenge sekirgen er adamdy sol mańnan ótip bara jatqan adamdar qutqaryp aldy.
Olardyń arasynda QR ІІM Tótenshe jaǵdaılar komıtetiniń «Qazavıaqutqarý» ókili de bolǵan, dep habarlaıdy QazAqparat tilshisi Shyǵys Qazaqstan oblystyń tótenshe jaǵdaılar departamentine silteme jasap.
«Kópirden ótip bara jatyp, áreketi kúdikti er adamdy kózim shaldy. Ol syrt kıimin sheship, kópirdiń qanatynan asyp ótti de, tómen qaraı sekirip ketti. Men birden ózenniń jaǵasyna jetip bardym. Sol kezde taǵy bir mashına toqtap, odan túskender de kómekke asyqty. Men qolma-qol «112» biryńǵaı dıspetcherlik qyzmetine qońyraý shaldym», - deıdi Aleksandr Kýzovnıkov.
Abyroı bolǵanda, 18 metr bıikten sekirgen er adam aman qalǵan. Ony ózenniń aǵysy jaǵaǵa shyǵardy. Sol mańdaǵy taǵy bir adam ony sýdan shyǵaryp aldy. Ústi-basy sý. Jedel qyzmet ókilderi jetkenshe, azamattar ony jyly kıindirip úlgergen.
Sol kezde Apattar medıtsınasy ortalyǵynyń qyzmetkerleri jetip úlgergen. Anyqtalýynsha, er adam mas bolǵan. Syrt belgilerine qaraǵanda, oǵan eshqandaı zaqym kelmegen. Oǵan tynyshtandyratyn dári bergen soń, polıtsııa qyzmetkerlerine tapsyrdy.
Foto: yk.kz
