Óskemende mas júrgizýshi tizgindegen kólik aýdarylyp qaldy
ÓSKEMEN. QazAqparat – Óskemen qalasynda spırtti ishimdik iship alyp, rýlge otyrǵan er adam jol-kólik oqıǵasyna tap boldy, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, 21 mamyr kúni tańǵy saǵat 06.20 shamasynda 35 jastaǵy er adam «VAZ» markaly avtokóligin mas kúıinde tizgindegen.
«Kenet ol rýlge ıe bola almaı qalyp, kólik aýdarylyp tústi. Jol-kólik oqıǵasy saldarynan zardap shekken eshkim joq», - dep habarlady vedomstvo ókilderi.
Qazirgi ýaqytta júrgizýshige qatysty Qazaqstan Respýblıkasy Ákimshilik quqyq buzýshylyq týraly kodeksiniń 608-babyna sáıkes ákimshilik hattama toltyrylǵan. Tıisti materıaldar Óskemen qalasynyń mamandandyrylǵan ákimshilik sotyna jiberildi.
Esterińizge sala ketsek, osyǵan deıin Shyǵys Qazaqstanda kólik aýdarylyp, 1 adam kóz jumǵan bolatyn.
