Óskemende mas júrgizýshi polıtsııa qyzmetkerine kúsh kórsetken
ÓSKEMEN. QazAqparat – Óskemen qalasynda mas kúıinde kólik tizgindegen er adam tártip saqshysyna baǵynbaı, kúsh kórsetken, dep habarlaıdy QazAqparat.
ShQO Polıtsııa departamenti baspasóz qyzmetiniń málimetine súıensek, oqıǵa 14 aqpanda tún kezinde bolǵan.
«Polıtseıler «Toyota Camry» markaly avtokólikti toqtatqan. Anyqtalǵandaı, ishimdik iship, rýlge otyrǵan 30 jastaǵy qala turǵyny osyǵan deıin kólik quralyn basqarý quqyǵynan aıyrylǵan. Ustalǵan kezde ol polıtsııa qyzmetkerine bylapyt sózder aıtyp, kúsh kórsetýden taıynbady», - dep habarlady vedomstvo ókilderi.
Tártip saqshylary er adamdy ýaqytsha ustaý ızolıatoryna qamap tastaǵan. Qazirgi ýaqytta tergeý amaldary júrgizilýde.
