Óskemende mas kúıinde turaqtaǵy úsh kólikti soqqan áıel 20 kúnge qamalady

Óskemen qalasynda mas kúıde rýlge otyryp turaqtaǵy 3 kólikti soqqan áıelge qatysty sot sheshimi shyqty, dep habarlaıdy Kazinform.

ShQO ákimshilik mamandandyrylǵan soty baspasóz qyzmetiniń málimetinshe, Óskemen qalasynyń turǵyny kólikti mas kúıinde tizgindegen.

Jyldamdyqty ruqsat etilgen shekten asyryp jibergen ol turaqta toqtap turǵan 3 birdeı kólikti soqty.

Sodan keıin kólik júrgizýshisi oqıǵa ornynan ketip qalǵan.

Sot barysynda áıel adam óz kinásin ishinara moıyndady.

Óz sózinde ol jol-kólik oqıǵasyna deıin emes, keıin ishimdik ishkenin jetkizdi.

«Sot sheshimimen qala turǵyny 20 táýlikke ákimshilik qamaqqa alynyp, 7 jyl merzimge kólik quralyn basqarý quqyǵynan aıyryldy. Qaýly áli zańdy kúshine engen joq», - delingen aqparatta.

Eske salsaq, buǵan deıin Óskemende mas kúıde rýlge otyrǵan áıel turaqtaǵy birneshe kólikti soqqany habarlanǵan.