Óskemende mas kúıinde rýlge otyryp, jol apatyna túsken er adam qamaldy
ÓSKEMEN. QazAqparat – Óskemende júrgizýshi kýáliginen aıyrylsa da, mas kúıinde rýlge otyrǵan er adam jol apatyna tústi, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, qańtar aıynyń sońynda 36 jastaǵy qala turǵyny 3 jyl merzimge kólik quralyn basqarý quqyǵynan aıyrylsa da, ishimdik iship alyp «Hyundai Solaris» kóligin tizgindegen.
Sátpaev dańǵyly men Baıbatchın kóshesiniń qıylysynda ol rýlge ıe bola almaı qalyp Nissan Cefiro» avtokóligimen soqtyǵysty.
«Atalǵan fakti boıynsha QR Qylmystyq kodeksiniń 346-baby 2-bóligimen sotqa deıingi tergeý amaldary júrgizilýde. «Hyundai Solaris» kóliginiń júrgizýshisi ızolıatorǵa qamaýǵa alyndy», - dedi ShQO PD bastyǵy Saǵat Mádıev.
Qazirgi ýaqytta birqatar sot-medıtsınalyq saraptamalar taǵaıyndalǵan. Sonyń nátıjesi boıynsha protsessýaldyq sheshim qabyldanady.
