Óskemende mas kúıinde kólik tizgindep, jaıaý júrginshini qaqqan jigit sottaldy
ÓSKEMEN. QazAqparat – Óskemen qalasynda mas kúıde kólik tizgindep, jaıaý júrginshini qaǵyp ketken 21 jastaǵy jigit jarty jylǵa bas bostandyǵynan aıyryldy, dep habarlaıdy QazAqparat tilshisi.
ShQO boıynsha QAJ departamenti baspasóz qyzmetiniń málimetine súıensek, alkogoldi ishimdik iship rýlge otyrǵan 21 jastaǵy er adam túngi ýaqytta azyq-túlik dúkeniniń mańynda jaıaý júrginshini qaǵyp ketken.
Soqqydan jerge qulap, esinen tanyp qalǵan áıelge medıtsına qyzmetkerleri kómek kórsetti.
Sottalýshy óz sózinde oqıǵanyń qalaı bolǵany múlde esinde joq ekenin aıtty.
Syra ishkenin moıyndaǵan ol azyq-túlik alý úshin dúkenge qaraı jol tartqanyn jetkizdi.
«Sot sheshimimen er adam 6 aıǵa temir torǵa qamalyp, kólik basqarý quqyǵynan 10 jylǵa aıyryldy. Óskemen turǵyny QR QK 345-baby 1-bóligimen probatsııa qyzmetinde esepte turatyn bolady», - dedi ShQO boıynsha QAJD Sol jaǵalaý aýdanynyń probatsııa aǵa ınspektory Azamat Sákenov.
