Óskemende mas kúıde rýlge otyrǵan áıel qarsy baǵyttaǵy kólikpen soqtyǵysty
ÓSKEMEN. QazAqparat – Óskemen qalasynda mas kúıde kólik tizgindegen áıel adam qarsy baǵyttaǵy kólikpen soqtyǵysty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Bajov kóshesinde kele jatqan Honda CR-V kóliginiń 37 jastaǵy júrgizýshisi qarsy baǵyttaǵy Toyota Land Cruiser Prado avtokóligimen soqtyǵysqan.
«Belgili bolǵandaı, áıel adam ishimdik iship alyp kólik tizgindegen. Kenet rýlge ıe bola almaı qalǵan ol qarsy baǵytqa shyǵyp ketip jol-kólik oqıǵasyna sebepker boldy. Jol apaty saldarynan Honda CR-V kóligi aýdarylyp qalǵan. Biraq eki júrgizýshi de zardap shekken joq», - dep habarlady vedomstvo ókilderi.
Mas kúıde kólik júrgizgen áıelge qatysty QR ÁQBtK-niń 608-baby boıynsha ákimshilik hattama toltyrylǵan. Atalǵan bap boıynsha ol bes jyl merzimge kólik quralyn basqarý quqyǵynan aıyrylýy múmkin.
