Óskemende mas kúıde kólik júrgizgen prokýror qyzmetinen qýyldy

ÓSKEMEN.KAZINFORM — Óskemen qalasynda prokýror kólikpen jaryq baǵanasyna soǵylyp, polıtseılerden qashyp qutylmaq bolǵany úshin jumystan shyǵaryldy. 

Belgili bolǵandaı, prokýror V. B. Pan kólik tizginine mas kúıde otyrǵan. Osyǵan qatysty is Ákimshilik quqyq buzýshylyq jónindegi mamandandyrylǵan sotta qaraldy.

Sot sheshimimen qadaǵalaý organynyń qyzmetkeri QR ÁQBtK-niń 608-baby 3-bóliginde kózdelgen ákimshilik quqyq buzý jasaǵany úshin kináli dep tanylyp, 20 táýlikke qamaýǵa alyndy. Sondaı-aq ol 7 jyl merzimge kólik basqarý quqyǵynan aıyryldy.

— Quqyq qorǵaý organynyń bedelin túsiretin teris qylyq jasaǵany úshin Óskemen qalasy prokýratýrasy bóliminiń prokýrory «Quqyq qorǵaý qyzmeti týraly» Qazaqstan Respýblıkasynyń zańyna sáıkes jumystan shyǵarylyp, «1-synypty zańger» synyptyq sheninen aıyryldy, — dep habarlady ShQO Prokýratýrasynyń baspasóz qyzmetinen.

Eske salsaq, osyǵan deıin Óskemen qalasynyń prokýrory ýaqytsha qyzmetinen shettetilgeni habarlanǵan.