Óskemende marıhýanany saıt arqyly satyp kelgen er adamnan 20 mln teńgeniń esirtkisi tárkilendi
ÓSKEMEN. KAZINFORM – Óskemen qalasynyń turǵyny marıhýana men gashıshti satý úshin arnaıy saıt ashqan. Tártip saqshylary ony ustap, 20 mln teńgeniń esirtkisin tárkiledi.
ShQO polıtsııa departamenti baspasóz qyzmetiniń málimetine súıensek, 32 jastaǵy er adam ózi ósirgen marıhýana men gashıshti satý úshin veb-saıt pen tanymal messendjerlerdiń birinde paraqsha ashqan.
«Sol arqyly klıent taýyp, tólemdi alǵannan keıin esirtkini aldyn ala kelisilgen oryndarǵa qaldyryp ketip otyrǵan. Onyń jer úıin tintý barysynda polıtseıler esirtkiniń ár alýan túrlerin ósirýge arnalǵan zerthanany anyqtady. Jedel ýákilder «qara naryqta» quny 20 mln teńgeden asatyn 1 keliden astam esirtkini tárkiledi», - delingen aqparatta.
Sondaı-aq tártip saqshylary úıden tarazylardy, oraıtyn materıaldar men elektrondy qurylǵylardy tapqan. Ustalǵan er adamnyń aıtýynsha, ol zattardy ósiretin tuqymdarǵa shetelden tapsyrys bergen.
Qazir atalǵan fakti boıynsha sotqa deıingi tergeý amaldary júrgizilip, kúdikti ýaqytsha ustaý ızolıatoryna qamaldy.
Eske salsaq, osyǵan deıin ShQO-da alaıaqtar ákimdik qyzmetkerleri atynan halyqtan aqsha surap jatqany habarlanǵan.
