Óskemende makaron ónimderiniń tapshylyǵy joq – ákimdik

ÓSKEMEN. QazAqparat – Óskemen qalasynyń ákimdigi makaron ónimderiniń tapshylyǵy joqtyǵyn málimdedi, dep habarlaıdy QazAqparat tilshisi.

Sońǵy kúnderi áleýmettik jelilerde Óskemende makaron ónimderiniń tapshylyǵy sezilip jatqany jaıly aqparat tarap ketti. Onda jazylǵandaı, turǵyndar dúken sórelerinen qanttan keıin jappaı makaron ónimderin satyp ala bastaǵan.

Qala ákimdigi bul aqparattyń shyndyqqa sáıkes kelmeıtinin málimdedi.

«Búgingi tańda dúken sórelerinde «Sálem», «Tsesna», «Sultan» jáne taǵy basqa qaptalǵan makaron ónimderi satylyp jatyr. Eshqandaı dúrbeleń, ónim tapshylyǵy joq. Satyp alýshylardan eń kóp suranys negizinen osyndaı qaptalǵan ónimderge túsedi», - delingen málimette.

Ákimdik qyzmetkerleriniń dereginshe, saýda núktelerinde makaron ónimderin tarazyda ólshetip satyp alýǵa da bolady.