Óskemende loto-klýbtan 1,4 mln teńge urlandy

ÓSKEMEN. QazAqparat – Óskemendik polıtseıler loto-klýbty tonap ketken er adamdy ustady, dep habarlaıdy QazAqparat Polisia.kz saıtyna silteme jasap.

Óskemen qalasy PB Ertis aýdandyq bóliminiń «102» jedel arnasyna JShS ákimshisinen habarlama túsken. Ol túngi ýaqytta beıtanys jigittiń lotereıa klýby kassasynan 1,4 mln teńgeni urlap ketkenin aıtqan.

Patrýldik polıtsııa batalony men Ertis polıtsııa bóliminiń jedel tergeý toby qyzmetkerleri kúdiktini ustady. Ol Ulan aýdanynyń 25 jastaǵy turǵyny bolyp shyqty. Jaýap alý kezinde er adam osy áreketin moıyndaǵan. Tártip saqshylary urlanǵan aqshany tárkileı aldy, alaıda tolyq kólemde emes.

Atalǵan fakti boıynsha QR QK-niń 191-baby 1-bóligimen (Tonaý) sotqa deıingi tergeý júrgizile bastady. Kúdiktige qatysty kelýge mindetteý túrindegi protsestik májbúrleý sharasy tańdaldy. Ol 4 jylǵa deıingi merzimge bas bostandyǵynan aıyrylýy múmkin.