Óskemende Lıtva konsýldyǵy ashyldy
ÓSKEMEN. QazAqparat - Búgin Óskemende Lıtva Respýblıkasynyń konsýldyǵy ashyldy, dep habarlady «QazAqparat» HAA tilshisi.
Shyǵys Qazaqstan ákimi Danıal Ahmetov ashylý rásimi aldynda Qazaqstandaǵy Lıtvanyń Tótenshe jáne Ókiletti Elshisi Vıtaýtas Naýdýjaspen kezdesti.
Danıal Ahmetov shetel qonaqtaryna ShQO-nyń ekonomıkalyq, mádenı, tabıǵı, tranzıttik áleýeti jaıly aıtty. Ákim óńirdiń sırek kezdesetin jer asty qazba baılyqtaryna jáne «atomdyq» áleýetine, agroónerkásiptik óndirisine basa toqtaldy.
Ákim álemdik tıtannyń 25 paıyzy ShQO-da óndiriletinin jetkizdi, munda sırek kezdesetin metaldyń biregeı óndirisi qurylǵan, óńirdiń aýyl sharýashylyǵy óndirisi jaqsy damyǵan.
Sondaı-aq aımaqtyń tranzıttik áleýetin aıta kele, aldaǵy ýaqytta Azııadan Eýropaǵa eń qysqa kólik joly iske qosylatynyna toqtaldy. Danıal Ahmetov «Tachı-Aıagóz» temir jolyn salý aıaqtalǵan soń ashylatyn jańa perspektıvalar jaıly sóz qozǵady.
Óz kezeginde lıtvalyq elshi Vıtaýtas Naýdýjas Óskemen kúlli álemge ýran óndirisi jáne basqa da sırek kedesetin qazba baılyqtarymen qosa kóriktiligimen, tabıǵatynyń alýan túrliligimen jaqsy belgili ekenin aıtty.
Elshi lıtvalyq teńiz porttarynyń orasan múmkindikteri jaıly habardar etip, yntymaqtastyqqa shaqyrdy. Kezdesýde taraptar tyǵyz yntymaqtastyqty retteý máselelerin talqylady.
«Ózara tıimdi yntymaqtastyq salalaryn tabýǵa tyrysaıyq, jumys isteýge daıynbyz. Bizdi aýyldyq mashına jasaý salasy qyzyqtyrady», - dedi Danıal Ahmetov.
