Óskemende Qytaı standarttaryna saı sertıfıkattaıtyn zerthana ashylady
ASTANA. QazAqparat - Óskemende bıyl aýyl sharýashylyq ónimderin qytaılyq standarttarǵa saı sertıfıkattaıtyn zerthana ashylady. Bul týraly oblys basshysy Danıal Ahmetov ákimdiktiń jıynynda aıtty, dep habarlaıdy QazAqparat.
Shyǵys Qazaqstan oblysy Qytaıǵa aýyl sharýashylyq taýarlardy eksporttaýdy byltyr qolǵa aldy. Ekijaqty kelissózder nátıjesinde Qytaı tarapy Shyǵys Qazaqstan aýmaǵynda zerthana ashýǵa qarjy bóletin bolǵan. Bul zerthana jergilikti aýylsharýashylyq ónimderdi qytaılyq standarttar boıynsha sertıfıkattaýy tıis. Bastapqy kezeńde zerthanada qytaılyq mamandar jumys istep, jergilikti qyzmetkerlerdi qondyrǵylarmen jumys isteýdi úıretetin bolady. Zerthana bergen sertıfıkatpen fermerler óz ónimderin Qytaı naryǵyna emin-erkin ótkizýge múmkindik almaq.
«Eki jyl boıy Qytaıǵa jasaǵan saparlardyń nátıjesinde kórshilermiz bizge bir mıllıard teńgeniń qondyrǵylaryn qaıtarymsyz negizde beretin boldy. Endi zerthanaǵa laıyq ǵımarat taýyp, qondyrǵylardy ornatý kerek. Sońǵy 10 jyldyń ishinde Qytaı halqynyń tutyný qabileti eselep ósti. Sondyqtan bizdiń tabıǵı ónimder ol jaqta jaqsy baǵaǵa satylady», - dedi D.Ahmetov.
Qytaıdyń azyq-túlik taýarlaryna qoılatyn talaptary álemdegi eń qatań standart sanalady. Tek aýyl sharýashylyǵyna qatysty 600-den astam standart bar. Qazirgi tańda Shyǵys Qazaqstannan bul elge kúnbaǵys maıy men bal ónimderi ǵana kedergisiz ótýde. Al daqyldar men et-sút ónimderin óz betimen sertıfıkattaý fermerler úshin múmkin bolmaı tur.
