Óskemende qyrkúıekte 1000 oryndyq №47 qazaq mektebi jumysyn bastaıdy
ASTANA. QazAqparat - Óskemen qalasynyń Jibek matalar kentindegi burynǵy Nazarbaev Zııatkerlik mektebiniń ǵımaraty №47 orta mektep bolyp ashylady, dep habarlaıdy «QazAqparat» HAA tilshisi.
Jýyrda ǵana Óskemende Nazarbaev Zııatkerlik mektebiniń jańa ǵımaraty paıdalanýǵa berilgen bolatyn. Qalanyń Satpaev dańǵylyndaǵy bilim ordasynyń ashylýyna Elbasy Nursultan Nazarbaev kelip qatysqan. Jýyqta Komsomol kóshesindegi NZM-niń burynǵy ǵımaratyn qazaq mektebine berý týraly qala ákiminiń qaýlysy shyqqan.
«1000 oryndyq №47 qazaq mektebinde oqýshylar eki aýysym boıynsha oqıdy. Bul mektepke Jibek matalar kentindegi №26 jáne №45 mektepterden, Oralhan Bókeı atyndaǵy №44 lıtseıden, 19-shaǵyn aýdandaǵy №46 mektepten oqýshylar kóshiriledi», - dep habarlady Óskemen qalasynyń bilim berý bóliminen.
Óskemen qalasynyń Jibek matalar kenti men 19-shaǵyn aýdanynda halyq sany jyl sanap artyp kele jatqanyn atap ótý kerek. Ásirese, qala basshylyǵy kópqabatty úıler kópten salynyp jatqan 19-shaǵyn aýdanda áleýmettik nysandardyń salynýyna basa mańyz berýde. Aldaǵy jyldary qalalyq bılik atalǵan shaǵyn aýdanda taǵy Oqýshylar saraıyn salýdy kózdep otyr. Budan bólek, Óskemen qalasynyń Ahmer aýylynda taǵy bir 1000 oryndyq mekteptiń qurylysy josparlanǵan. Sonymen birge, Sogra kentindegi №26 mektep keńeıtiletin bolady.
