Óskemende qutqarýshylar jolda qalǵan 4 adamǵa kómektesti
ShQO Tótenshe jaǵdaılar departamenti baspasóz qyzmetiniń málimetine súıensek, 4 er adam avtokólikpen Sheshek asýynan negizgi tasjolǵa túse almaı qaldy. Sebebi joldy qar jaýyp tastaǵan. Oqıǵa ornyna kelgen qutqarýshylar olarǵa jolǵa shyǵýǵa kómektesti.
Al osydan 2 kún buryn «Aıagóz-Qaraýyl» tasjolymen Aqshataý aýyldyq okrýginiń mańyndaǵy qystaýǵa bara jatqan 5 adam, onyń ishinde 3 bala jolda qalǵan bolatyn. №22 órt sóndirý bóliminiń qyzmetkerleri kólikti tazartylǵan jol ýchaskesine súırep aparyp, Aıagóz qalasyna deıin shyǵaryp saldy.
Osy rette, oblystyq TJD mamandary óńir jurtshylyǵyna qaýipsizdik sharalaryn saqtaý qajettigin eske salady.
«Daýyldy eskertý jarııalanǵan kezde alys jolǵa shyǵýǵa bolmaıdy. Joldardyń jabylǵandyǵy týraly aqparatty «Dármen» mobıldi qosymshasy arqyly bilip otyrýǵa bolady», - delingen aqparatta.
