Óskemende qutqarýshylar sýıtsıdtiń aldyn aldy
Qalalyq TJB baspasóz qyzmetiniń málimetine súıensek, 19 sáýir kúni saǵat 19.30 shamasynda qutqarýshylarǵa Qazybek bı kóshesindegi turǵyn úıdiń toǵyzynshy qabatynan sekireıin dep turǵan azamat jaıly habar túsken.
«Osydan bir apta buryn dál osy 1992 jylǵy shahar turǵyny óz ózin óltirmek bolǵan. Sol kezde ShQO TJD psıhologtary ony bul raıynan qaıtarǵan edi. Alaıda er adam taǵy da sýıtsıd jasaǵysy kelgen. Tipti óz balalaryn terezeden laqtyryp jiberetindigin aıtyp qorqytýǵa deıin bardy», - dep habarlady vedomstvo ókilderi.
Birden oqıǵa ornyna attanǵan Tótenshe jaǵdaı departamentiniń qutqarýshylary sol aýmaqty qorshap, qalaı áreket etý kerektigin josparlap aldy. Al psıholog Svetlana Andrýsenko páterge deıin kóterilip álgi janmen sóılese bastaǵan.
Mas kúıde bolǵan azamat materıaldyq jaǵdaıynyń tómendigin, 4 balasyn asyraı almaıtynyn aıtypty. Terezede turǵan ol esiktiń arǵy jaǵyndaǵy psıhologpen tildesý barysynda balasyn kóterip alyp, sekirip ketetindigin aıtyp, q orqytqan.
«Sýıtsıdke barǵyzbas úshin onyń oıyn bólip, kóńilin aýlap áńgimege tarttym. 30 mınýt ishinde ol biraz ózine kelip, ashyla sóılesti. Osy sátti paıdalanyp esikti ashýyn ótingenimde aıtqanyma qulaq asty», - deıdi Svetlana Andrýsenko.
Er adamdy áıeli qoldap kelgen eken. Biraq onyń da sońǵy ýaqyttarda kúızeliske túskeni belgili boldy. Otbasy músheleri birden qalalyq ákimdikke jetkizildi. Oqıǵanyń mán-jaıy, sebep-saldary anyqtalýda.