Óskemende qutqarýshylar sý basý qaýpi bar jerlerge barlaý júrgizdi
ÓSKEMEN. QazAqparat – Óskemen qalasynda qutqarýshylar sý basý qaýpi bar jerlerge barlaý júrgizdi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, sý tasqynynyń aldyn alý úshin qala ákimdiginiń qyzmetkerleri men qutqarýshylar reıdke shyqty. Jalpy Óskemende 950-den astam turǵyn úıdi sý basý qaýpi joǵary.
Mamandar Sogra aýdanyndaǵy, Ahmer, Shyǵys kentteri men 22-shaǵyn aýdanyndaǵy sý tasqyny qaýpi bar jerlerdi tekserdi. Búginde Bezymıannyı jylǵasynyń arnasy muzdan tazartylyp, Shyǵys jáne Ahmer kentterindegi aryqtar, «Vostochnık-5» baý-baqsha qaýymdastyǵyndaǵy kópir asty tazalanǵan. Mahovka ózeninde jaǵalaýdy bekitý jumystary júrgizildi.
«Qutqarýshylar jaqyn arada turǵyn úılerdi aralaýdy bastaıdy. Jurtshylyqqa kóktemgi sý tasqyny kezeńine qatysty nusqaýlyqtar ótkizip, aqparattyq jadynamalar taratylady. Merdiger uıymdardyń da sý tasqynyna daıyndyǵy tekseriledi», - delingen aqparatta.
Aıta keteıik, shaharda tótenshe jaǵdaıdyń aldyn alý maqsatynda TJ basqarmasynda jedel shtab jáne mobıldi toptar qurylǵan. Olardyń maqsaty – sý tasqyny kezinde shuǵyl áreket etý.
