Óskemende qutqarýshylar garajǵa qamalyp qalǵan turǵynǵa kómekke keldi
ÓSKEMEN. QazAqparat – Óskemen qalasynyń turǵyny garajǵa qamalyp qalǵan, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, er adam Serikbaev kóshesinde ornalasqan garajǵa qamalyp qalǵan. Sondaı-aq garaj ishindegi kólik otalyp turǵan. Muny sol mańnan ótip bara jatqan kýágerler baıqap qalyp, qutqarýshylarǵa qońyraý shaldy.
«Oqıǵa ornyna shuǵyl kelip jetken jedel qutqarý jasaǵynyń qyzmetkerleri garajdyń temir esigin buzyp ashty. Qutqarylǵan er adamnyń densaýlyǵy qanaǵattandyrarlyq jaǵdaıda. Qazirgi ýaqytta polıtsııa qyzmetkerleri oqıǵanyń mán-jaıyn anyqtap jatyr», - dep habarlady vedomstvo ókilderi.
Osy rette, departament mamandary óńir jurtshylyǵyna otalyp turǵan garajda qalǵan jaǵdaıda ıis tııý qaýpi joǵary ekendigin eskertedi.
