Óskemende qutqarýshylar 8 gektar aýmaqqa jaıylǵan órtti sóndirýge qaıyqpen attandy
ÓSKEMEN. QazAqparat – Óskemen qalasynda qutqarýshylar kólikpen jetý uzaq ýaqytty alatyndyqtan qurǵaq shópti sharpyǵan 8 gektar aýmaqtaǵy órtti aýyzdyqtaý úshin qaıyqpen ketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 27 sáýir kúni saǵat 14.47-de Óskemen qalasyndaǵy Ertis ózeniniń sol jaǵalaýynda shóp órtengeni jaıly habar túsken. Aldyn ala málimet boıynsha tilsiz jaýdyń jalpy aýdany 8 gektardy quraǵan.
«Oqıǵa ornyna órt sóndirý kólikterimen jetý kóp ýaqytty alady. Sondyqtan jeke quramdy jetkizý úshin qaıyqtar iske qosyldy. Qutqarýshylar arnaıy tehnıkadan basqa otty qaqqyshtar men aspaly órt sóndirgishtiń kómegimen aýyzdyqtaıdy», - dep habarlady vedomstvo ókilderi.
Oqıǵa ornyna barlyǵy 2 tehnıka, 2 qaıyq jáne jeke quramnan 10-nan astam adam jumyldyrylǵan.
