Óskemende qurylys qarqyny artqandyqtan jylý energııasy tapshylyǵy týyndaýy múmkin be
ÓSKEMEN. QazAqparat – ShQO ákimdiginde ótken jınalys barysynda Óskemen qalasynda qurylys qarqyny artqandyqtan jylý energııasy tapshylyǵy týyndaý múmkindigi talqyǵa salyndy, dep habarlaıdy QazAqparat tilshisi.
Oblys ákimdiginiń málimetine súıensek, Óskemende kópqabatty úıler qurylysy qarqyndy júrip jatyr. Soǵan baılanysty aldaǵy jyldary jylý energııasynyń tapshylyǵy týyndamas úshin birqatar shara qolǵa alynýy tıis.
«Qazirdiń ózinde jylý ortalyǵyndaǵy №2 qazandyqty keńeıtýge arnalǵan jobalyq-smetalyq qujattama bar. №16 qazandyq agregaty boıynsha da aýqymdy joba daıyndalýda. Menshik ıesi ony iske asyrý merzimderin anyqtap, qujattardy retke keltirýde. Osy jobalardy júzege asyrý qosymsha 240 gıgakalorııa beredi. Bul aldaǵy bes jyldaǵy jylý tapshylyǵyn joıady», - dedi oblys ákimi Danıal Ahmetov.
Óz sózinde ol qala ákimine taldaý júrgizý jáne qýattylyqty arttyrý úshin ne isteý kerektigin saralaýdy, jańa JEO salý nemese qolda bar jylý kózderin jańǵyrtý úshin jobalaýshy mamandardy shaqyrýdy tapsyrǵanyn jetkizdi.
«Óskemende qurylys qarqyny tómendetpeıtindikten, jylý tapshylyǵy týyndamas úshin barlyq tıisti jumys atqarylatyn bolady. Jaǵdaı turaqty baqylaýda», - dedi aımaq basshysy.
