Óskemende qurylysy aıaqtalmaǵan «Azııa Avto» zaýyty ákimdikke beriledi
ÓSKEMEN. KAZINFORM - Óskemen qalasynda qurylysy aıaqtalmaǵan «Azııa Avto» zaýyty Shyǵys Qazaqstan oblysy ákimdiginiń qaramaǵyna beriledi.
Bul «Azııa Avto — Bıpek Avto» tobyna qatysty is aıasynda tárkilengen iri ónerkásiptik nysan. Qazirgi tańda nysandy oblys ákimdiginiń menshigine berý rásimi aıaqtalýǵa jaqyn.
- Aıaqtalmaǵan zaýyttyń tárkilengen múlki zańnamaǵa sáıkes Shyǵys Qazaqstan oblystyq memlekettik múlik jáne jekeshelendirý departamentinen oblys ákimdiginiń balansyna beriledi, - dep habarlady oblys ákimdiginiń baspasóz qyzmetinen.
Osylaısha, óńir bıligi uzaq ýaqyt boıy taǵdyry belgisiz bolyp kelgen eń iri aıaqtalmaǵan ındýstrııalyq jobalardyń birin óz qaraýyna almaq. Buǵan deıin bul óndiristik alań elektrondy saýda portalyna qoıylǵanymen, onyń baǵasy nól teńge dep kórsetilgen edi.
— Oblys bul aýmaqty kásipkerlikti jáne ónerkásipti damytý, jańa jumys oryndaryn ashý jáne óńir ekonomıkasyn ilgeriletý maqsatynda paıdalanýǵa múddeli, — delingen aqparatta.
Qujattarǵa sáıkes, zaýyt aýmaǵynda 37 myńnan astam múlik saqtalǵan. Olardyń qatarynda óndiristik jabdyqtar men qosalqy materıaldar bar. Aldyn ala baǵalaý boıynsha olardyń jalpy quny shamamen 124 mln teńgeni quraıdy.
Eske salsaq, osyǵan deıin «Bıpek Avto» kompanııalar tobynan memleketke 11,6 mlrd teńgeniń múlki tárkilengeni habarlanǵan.
