Óskemende qurylys kompanııalary úleskerlerden zańsyz aqsha jınaýyn toqtatpaýda

ÓSKEMEN. KAZINFORM — Óskemen qalasynda úleskerlerden zańsyz aqsha tartýdyń jańa faktileri anyqtaldy.

Tıisti ruqsat qujattary bolmasa da úleskerlerden aqsha jınaǵan eki qurylys kompanııasyna qatysty ákimshilik is qozǵaldy. Oblystyq memlekettik sáýlet-qurylys baqylaý basqarmasynyń málimetinshe, bul jeti turǵyn úı keshenine qatysty.

— «Turǵyn úı qurylysyna úlestik qatysý týraly» zańǵa sáıkes, qurylys salýshylar azamattardan aldyn ala qarajat jınaý úshin arnaıy ruqsat alýǵa mindetti. Alaıda keıbir kompanııa bul talaptardy oryndamaıdy. Qazirgi ýaqytta óńirde 73 turǵyn úı kesheni salynyp jatyr, onyń 53-i jeke ınvestorlardyń qarajatyna, al 20-sy memlekettik baǵdarlamalar aıasynda, — delingen aqparatta.

Turǵyndarǵa beriletin «Brondaý sharty» zańdy qujat bolyp sanalmaıdy jáne páterdi belgilengen merzimde alýǵa kepildik bermeıdi. 

Aıta keteıik, buǵan deıin Astoria, Emeralds jáne Delux Town turǵyn úı keshenderi salyp jatqan qurylys kompanııalaryna qatysty qylmystyq is qozǵalǵan bolatyn. Bul kompanııalar 200-den astam adamdy úleskerlikke tartty. Osylaısha, bul kompanııalar turǵyndardan 3 mlrd teńgege jýyq qarjy jınaǵan.

Eske salsaq, osyǵan deıin Almatydy eki jylda 65 nysan súrilgeni habarlanǵan.