Óskemende qurastyrylǵan 3 myńǵa jýyq avtokólik Qytaıǵa eksporttalady

ASTANA. QazAqparat - Óskemendik «Azııa Avto» AQ jyl sońyna deıin Qytaıǵa 3 myńǵa jýyq avtokólikti eksportqa shyǵarmaq. Qazaqstan - Qytaı shekarasynan óterde kólik baǵalarynyń qymbattaıtynyna qaramastan, shyǵystaǵy kórshi memleket qazaqstandyq avtokólikterge zor qyzyǵýshylyq tanytyp otyr, dep habarlaıdy «QazAqparat» HAA tilshisi.

Bul týraly búgin OKQ brıfınginde «Qazavtoóndiris» Qazaqstan avtomobıl salasy kásiporyndary odaǵynyń» basqarma tóraǵasy Oleg Alferov málim etti.

«Qazaqstan shekarasynan Qytaıǵa ótkizer kezde avtokólikterdiń qymbattaıtynyna qaramastan, suranys artyp keledi. Іshki naryqta, máselen, 3 mıllıon teńgege satylatyn avtokólik Qytaıda 4,4 mıllıon teńge turýy múmkin. Osyǵan qaramastan óskemendik «Azııa Avto» AQ jyldyń sońyna deıin qytaılyq naryqqa 3 myńǵa avtokólik ótkizýdi josparlap otyr», - deıdi Oleg Alferov.

Basqarma tóraǵasynyń sózine súıensek, ótken aptada ǵana «KAZAKH INVEST» Ulttyq kompanııasynyń ókilderi men Óskemendegi avtokólik óndirýshi kásiporyn basshysy Beıjińge baryp, sol jaqtaǵy memlekettik organdarmen sertıfıkat alý jáne lıtsenzııalaý máselesin talqylaǵan. Kezdesýde tasymal júrgizý máseleleri kelisilgen. Qytaıda sertıfıkat alý jumysy men ózge de ákimshilik kedergiler jeterlik. Eýrazııalyq ekonomıkalyq odaq elderi arasynda ımporttyq tarıf 30 protsent bolsa, Qytaıda bul kórsetkish 66 protsentke deıin jetken. Soǵan qaramastan, qazaqstandyq tarap bul kedergilerdi eńserdi dese de bolady», - deıdi basqarma tóraǵasy.

Eksportqa «Lada» avtokóliginiń klassıkalyq modelderi ǵana emes, Óskemende qurastyrylatyn kólikterdiń ózge túrleri shyǵarylmaq. Oleg Alferov sonymen birge, bıyl Qazaqstanda «KIA», «Chevrolet», «Ravon» syndy avtokólik modelderiniń birneshe túrleri qurastyryla bastaǵanyn habarlaıdy.

«Avtokólik modelderiniń qosymsha túrleriniń qurastyryla bastaǵany qazaqstandyqtardyń tańdaý múmkindigin arttyra tústi», - dep túıdi Oleg Alferov.