Óskemende kún saıyn kóktaıǵaqtan 100-den astam adam zardap shegedi

ÓSKEMEN. KAZINFORM – Óskemen qalasynda kún saıyn kóktaıǵaqtan ortasha eseppen 100-110 adam zardap shegedi.  

№ 4 qalalyq aýrýhananyń jaraqat bólimine keıingi bir aıda 2 357 adam medıtsınalyq kómekke júgingen. Olardyń 1 398-i, ıaǵnı 59 paıyzy jaraqatty kóshede alǵan.

– Osy kezeńde kóshede alǵan jaraqattar boıynsha ótinishter sany bir táýlikte 180-nen asqan bir ǵana kún boldy. Al ortasha táýliktik kórsetkish ádette 100-110 adamdy quraıdy. Sol kúni aýa raıy kúrt ózgerip, kóktaıǵaq pen boran bastalǵan. Osyǵan baılanysty biz kezekshilikti kúsheıtip, ádettegi eki dárigerdiń ornyna tórt dárigerdi jumysqa shyǵardyq, - deıdi emhananyń bas dárigeri Sergeı Popov. 

Onyń aıtýynsha, jaraqat bólimine keletinder sany kóbeıgen kezde ortopedııa bólimshesi de kómek kórsetedi. Otadan shyqqan dárigerler naýqastardy qabyldaýǵa qosylady. Keıde mamandar demalys kúnderi de jumysqa shyǵady.

– Qazirgi tańda jaǵdaı turaqtalǵan. Bólimde eki dáriger qyzmet atqaryp jatyr, al táýliktik ótinishter sany 60-70 adamǵa deıin azaıǵan. Bul ortasha táýliktik normadan tómen, - deıdi S.Popov. 

Eske salsaq, osyǵan deıin «QazAvtoJol» ulttyq kompanııasy eldegi joldardyń qazirgi ahýaly týraly habarlaǵan edi.