Óskemende kúdikti sómkege bola dúkennen 300 adam evakýatsııalandy
ASTANA. QazAqparat - Shyǵys Qazaqstan oblysynyń Óskemen qalasyndaǵy «Gorızont» dúkeninde qaraýsyz qalǵan sómkeniń saldarynan búkil aýdan qorshaýǵa alyndy, dep habarlaıdy YK-news.kz.
Búgin saǵat 12-de polıtsııaǵa Mıhaelıs kóshesinde ornalasqan «Gorızont» dúkeninde terezeniń aldynda qaraýsyz qalǵan sporttyq sómkeniń jatqany týraly habarlama kelip tústi. Habarlanǵan mekenjaıǵa polıtsııa jasaǵy jetti.
«Qaýipsizdikti saqtaý maqsatynda polıtseıler aýdandy qorshaýǵa alyp, avtokólikter men jaıaý júrginshiler qozǵalysyna shekteý qoıyldy. Sonymen qatar, dúkenge kelýshiler men turǵyn úılerdegi 300 adam evakýatsııalandy. Saperler sporttyq sómkeni tekserip, onyń ishinen kúdik keltiretin eshteńe tappady. Onda zattar men azyq-túlik bolǵan», - dedi ShQO ІІD baspasóz qyzmetiniń basshysy Baqytjan Torǵaev.
Birneshe ýaqyt ótkennen keıin azyq-túlik salynǵan sómkeniń ıesi tabyldy. Jas jigit ony dúkende umytyp qaldyryp ketken eken.
