Óskemende kóshede ıesiz ıtti sabaǵan adam 30 kúnge qamalýy múmkin

Óskemen qalasynda kóshede ıtti sabaǵan er adam 30 kúnge qamalýy múmkin, dep habarlaıdy Kazinform. 

Oqıǵa qaladaǵy Bajov kóshesinde bolǵan. Dúken mańynda er adam ıtti sabap jatty.

Muny polıtsııa qyzmetkerleri baıqap qalyp, ony dereý toqtatqan.

Qala turǵyny ıttiń balasyn qaýyp ala jazdaǵandyqtan osyndaı áreketke barǵanyn túsindirdi.

«Atalǵan fakti boıynsha er adamǵa qatysty QR Qylmystyq kodeksiniń 316-babyna (janýarlarǵa qatygezdik kórsetý) sáıkes sotqa deıingi tergeý amaldary júrip jatyr. Tergeýdi Óskemen qalasynyń prokýratýrasy óz baqylaýyna aldy. Kináli adam zań sheńberinde jaýapqa tartylady», - dep habarlady qalalyq prokýratýradan.

Osy bap boıynsha 120 AEK (414 000 teńge) kóleminde aıyppul salynyp, sol merzimge qoǵamdyq jumysqa tartylý nemese 30 táýlikke deıin qamaý jazasy qarastyrylǵan.