Óskemende kóshede áıelin pyshaqtap jatqan qaskóıge qarsy turǵan jigit marapattaldy

ÓSKEMEN. KAZINFORM – Óskemen qalasynda kóshede áıelin pyshaqtap jatqan qaskóıdi kórgen jigit esh oılanbastan kómekke umtylǵan. Ony qarýsyzdandyryp, polıtseıler kelip jetkenshe ustap turǵan. Osylaısha, áıel adamdy aman alyp qalǵan ol bul erligi úshin marapattaldy.

Oqıǵa osy jyldyń jazynda bolǵan. Qazaqstan-Amerıkandyq erkin ýnıversıtetiniń 3-kýrs stýdenti Almas Elemes Óskemendegi dámhanalardyń birinde kýrer bolyp jumys istep júrgen. Túnde kóshede tapsyrysty apara jatqanda kómek surap aıqaılaǵan daýysty estip qalady. Almastyń qasynda taǵy birneshe kýrer jigit bolǵan. 

«Sol kezde olar kóshede ushy qanǵa boıalǵan pyshaq ustap turǵan er adamdy kórdi. Ol buryn azamattyq nekede bolǵan áıelin uryp, pyshaq suǵyp jibergen. Bir sekýnd ta oılanbastan kómekke umtylǵan Almas mas jáne agressıvti qaskóıdi qarýsyzdandyryp, polıtsııa kelgenge deıin ustap turdy», - dep habarlady qala prokýratýrasynyń baspasóz qyzmeti. 

Aýyr jaraqat alǵan áıel der kezinde dárigerlerge jetkizilgendikten aman qaldy. Belgili bolǵandaı, oǵan shabýyl jasaǵan adam birneshe ret sottalǵan, qaýipti retsıdıvıst. Ol kisi óltirýge oqtalǵany úshin sot sheshimimen kináli dep tanylyp, qatań rejımdegi kolonııaǵa 10 jylǵa qamaldy. 

«Almas Elemes óz ómirine qaýip tónse de basqa adamdy qutqarýdan taıynbady. Onyń batyl áreketi zor qurmetke laıyq jáne basqalarǵa úlgi. Qala prokýratýrasy Almasqa shyn júrekten alǵys bildiredi. Bul jaǵdaı naǵyz batyrlardyń bizdiń aramyzda júrgenin kórsetti»,- delingen aqparatta. 

Beıbit kúnniń batyryna Óskemen qalasy prokýrorynyń atynan Alǵys hat tabys etildi. 

Eske salsaq, osyǵan deıin Óskemende aıaldamada júregi toqtap qulap qalǵan ájeni dárigerler qutqaryp qalǵany habarlanǵan.