Óskemende kóshe jaryǵyna bólingen aqshanyń jymqyrylýyna qatysty is sotqa jiberildi

ÓSKEMEN. KAZINFORM – Qarjylyq monıtorıng agenttiginiń Shyǵys Qazaqstan oblysy boıynsha departamenti «ShQO memlekettik-jekeshelik áriptestik óńirlik ortalyǵy» AQ-dan bıýdjet qarajatyn jymqyrý faktisi boıynsha qylmystyq isti tergeýdi aıaqtady.

Tergeý málimetterine súıensek, 2019 jyly Óskemen men Semeı qalalary kósheleriniń jaryqtandyrylýyn jańǵyrtý jobasy qolǵa alynǵan. Eskirgen jaryqty energııany únemdeıtin jaryqdıodty shamdarǵa aýystyrý kózdelgen edi. Bul energııa shyǵynyn azaıtyp, jaryq sapasyn jaqsartady dep kútilgen.

- Alaıda ortalyq qyzmetkerleri jumys pen qural-jabdyqtardyń baǵasyn qoldan ósirip, jalǵan qujattarǵa qol qoıǵany anyqtaldy. Budan bólek, jobaǵa tehnıkalyq talaptarǵa saı kelmeıtin jaryqtandyrý qurylǵylary da engizilgen. Osynyń saldarynan memleketke keltirilgen jalpy shyǵyn 2,5 mlrd teńgeni qurady, - delingen aqparatta.

Belgili bolǵandaı, ortalyq basshysy qosalqy merdiger bolǵan kompanııany ózine senimdi adamnyń atyna tirkep qoıǵan. Sol arqyly jalǵan kelisim-sharttar jasalyp, aqshany qolma-qol etip shyǵaryp otyrǵan.

Jymqyrylǵan aqsha 265 mln teńge turatyn sándi jyljymaıtyn múlikter men avtokólikter satyp alýǵa jumsalǵan. Sot ary qaraı tárkileý úshin múlikke toqtam saldy. Kúdiktiler qamaýǵa alynǵan. Іs sotqa jiberildi.

Eske salsaq, buǵan deıin Óskemende kólik jýýshy bógde adamnyń kóligin aǵashqa soǵyp, 2 mln teńge shyǵyn keltirgeni habarlanǵan.