Óskemende koronavırýs juqtyrǵan zeınetkermen 198 adam baılanysta bolǵan
ÓSKEMEN. QazAqparat – Óskemen qalasynda koronavırýs juqtyrǵan alǵashqy adam tirkeldi, dep habarlaıdy QazAqparat.
ShQO Densaýlyq saqtaý basqarmasynyń basshysy Іlııas Muhamedjannyń aıtýynsha, juqpaly indetke 1938 jylǵy áıel adam shaldyqqan. Ol dárigerlerge 1 sáýir kúni ózi júginipti.
«Naýqas birden aýrýhanaǵa jetkizilip, rentgenologııalyq zertteýler jasaldy. Oǵan «pnevmonııa» dıagnozy qoıylǵan. Patsıentten koronavırýske qatysty alynǵan synama oń nátıje kórsetti», - deıdi ol.
Basqarma basshysynyń sózine sensek, zeınetker qańtar aıynda Reseıge baryp kelgen. Qazirgi ýaqytta naýqaspen baılanysta bolǵan 198 adam anyqtalyp otyr. Olardyń barlyǵy oqshaýlandy.
Aıta keteıik, osymen ShQO-da koronavırýs juqtyrǵan 3 adam tirkeldi. Buǵan deıin Mysyrdan demalystan kelgen Semeı qalasynyń 2 turǵynynan vırýs anyqtalǵan bolatyn.
