Óskemende koronavırýs juqtyrǵan ekinshi naýqas 82 jastaǵy qarııa
ÓSKEMEN. QazAqparat – Óskemen qalasynda koronavırýs juqtyrǵan ekinshi adam tirkeldi, dep habarlaıdy QazAqparat.
«30 naýryz kúni statsıonarǵa túsken 1938 jylǵy er adamǵa «pnevmonııa» dıagnozy qoıylǵan. Bekitilgen algorıtmge sáıkes, odan koronavırýsqa synama alyndy. Synama oń nátıje kórsetken. Qazirgi ýaqytta naýqastyń jaǵdaıy ortasha», - deıdi ShQO Densaýlyq saqtaý basqarmasynyń basshysy Іlııas Muhamedjan.
Onyń aıtýynsha, patsıent buǵan deıin koronavırýs juqtyrǵan óskemendiktiń týysy emes. Zeınetkermen baılanysta bolǵan 55 adam anyqtalyp otyr. Sonyń ishindegi 12 adamnyń synamasy teris nátıje kórsetse, qalǵan 43 adamnyń synamasynyń nátıjesi áli shyqqan joq.
Aıta keteıik, búginde Shyǵys Qazaqstanda 4 adam koronavırýs ınfektsııasyn (Óskemende – 2, Semeıde – 2) juqtyrǵan.
