Óskemende kópshilik orynda maska taqpaıtyndar az emes – Qoǵamdyq baqylaý úılestirýshisi

ÓSKEMEN. QazAqparat – Elimizde koronavırýstyń taralýy báseńdegenimen áli bosańsýǵa erte ekendigi anyq. Ókinishke qaraı, karantın alynsa da, onyń shekteýleri kúshinde qalǵanyn túsinbeı júrgender bar. Osy rette Qazaqstannyń ár óńirinde qurylǵan Qoǵamdyq baqylaý toptary dúıim jurtqa túsindirý jumystaryn júrgizip, medıtsınalyq mekemelerdegi dárigerlerdiń jumys jaǵdaıyn baqylaýda. QazAqparat tilshisine suhbat bergen Óskemendegi Qoǵamdyq baqylaý tobynyń úılestirýshisi Olesıa Klınkova osyndaı sharalardyń egjeı-tegjeıin aıtyp berdi.

- Qazirgi ýaqytta qandaı jumystar atqarylýda?

- Qoǵamdyq baqylaý tobynyń negizgi maqsaty – karantındik shekteý sharalarynyń oryndalýyna, gýmanıtarlyq kómekti úılestirýge monıtorıng júrgizý, medıtsınalyq mekemelerdegi dárigerlerdiń jumys jaǵdaıyn baqylaýda ustaý. Osy ýaqytqa deıin birqatar reıd júrgizdik. Aýrýhanalardy, dárihanalardy tekserdik. Qoǵamdyq oryndardy aralap, halyqtyń maska taǵý rejımin, áleýmettik qashyqtyqty saqtaýyn qadaǵaladyq. Bári tamasha deýge kelmes. Óskemendegi dárihanalarda dári-dármek tapshylyǵy bar. Saýda oryndarynda, avtobýstarda dezınfektsııalaý sharalary keıde ýaqytyly júrgizilmeı jatady. Sonymen qatar jurt arasynda bekitilgen shekteýlerdi elemeıtinder az kezdespeıdi. Olarǵa túsindirý jumystaryn júrgizip jatyrmyz. Eger ekinshi ret zańǵa baǵynbaýshylyq tirkelse, onda oǵan aıyppul salynýda.

- Qoǵamdyq baqylaý tobynda qansha adam jumys isteıdi?

- Búginde bul jumystarǵa 10-ǵa jýyq adam tartylǵan. Onyń ishinde eriktiler de bar. Bárimiz ortaq múdde úshin eńbek etýdemiz.

- Shekteýlerdi saqtamaıtyn azamattar eskertýlerińizdi qalaı qabyldaıdy?

- Ártúrli adam bolady. Bireý óz qatesin moıyndap, endi maska taǵyp júretinin aıtady. Al endi bireýi koronavırýsqa senbeıtinin, eshqandaı aýrý joqtyǵyn dáleldep álek bolady. Ondaılarǵa «bul tek bizdiń eldi emes, kúlli álemdi dúrliktirgen dert» dep shama-sharqymyz jetkenshe túsindiremiz. Jalpy Óskemen turǵyndary basqa qalalarmen salystyrǵanda – tártipti. Buǵan basqa óńirlerdegi áriptesterimmen sóıleskennen keıin kózim jetti. Mysaly, sońǵy júrgizilgen reıd barysynda tek 5 adamǵa eskertý jasaldy.

- Reıd kezinde qandaı da bir este qalarlyqtaı oqıǵalar oryn aldy ma?

- Birde shahardaǵy dárihanalardyń birin tekserý úshin bardyq. Іshke kirsek farmatsevt maskany ıegine túsirip qoıypty. Ne úshin maskany durys taqpaı turǵanyn suraǵanymyzda «Jańa ǵana túski as ishken edim» dep jaýap berdi. Álbette, olaı isteýge bolmaıdy. Dárihanaǵa koronavırýsqa shaldyqqan adam kelýi múmkin ǵoı. Sondyqtan biz farmatsevtke túsindirý jumystaryn júrgizdik. Eki kúnnen keıin álgi dárihanany taǵy da tekserdik. Bul joly farmatsevt maskany talapqa saı taǵyp alǵan eken. Demek, eskertýimizdi túsinip, oń nátıje shyǵardy.

- Halyqqa karantındik shekteýlerdi saqtaý qajettigin túsindirý úshin áleýmettik jelilerdi paıdalanasyzdar ma?

- Árıne. Barlyq áleýmettik jelilerde paraqshalarymyz bar. Sonda qandaı jumystar atqaryp jatqanymyzdy jarııalap, esep beremiz. Jurtshylyqqa qoǵamdyq oryndarda maska taǵyp, áleýmettik qashyqtyqty saqtaý qajettigin udaıy eskertip otyramyz. Turǵyndar paraqshalarymyzǵa talap-usynystaryn da jazyp qaldyra alady. Árkimge qoldaý kórsetýge daıynbyz.

- Áńgimeńizge rahmet!