Óskemende kópirdiń qulaýy: Saraptama jasaý úshin Almatydan mamandar shaqyryldy

ÓSKEMEN.KAZINFORM — Óskemen qalasynda ishinara búlingen Shnaıdar kópirine tehnıkalyq saraptama júrgizý úshin Almatydan mamandar shaqyryldy. 

Keshe qalada sý shaıǵan Shnaıdar kópiri jartylaı qulap, jergilikti deńgeıdegi tótenshe jaǵdaı jarııalanǵan edi. Sóıtip, Úlbi ózeniniń eki jaǵalaýyn qosatyn aınalma jolmen júrý múmkin bolmaı qaldy. Bul kólik qozǵalysyn aıtarlyqtaı qıyndatty.

Qazir kópirge tehnıkalyq saraptama júrgizý úshin Almatydan mamandar shaqyrylyp otyr.

— Bul kópirge sońǵy eki jyl ishinde jóndeý jumystary júrgizilgen. Jalpy mólsheri 600 mln teńge ıgerilgen. Endi kópirge tekserý júrgizemiz. Merdiger kompanııanyń kepildik mindettemeleri bar. Solardyń negizinde kópirdi qalpyna keltirý jumystary atqarylady, — dedi qala ákimi Almat Aqyshov.

Óz sózinde ol kópirdi meılinshe qysqa merzimde qalpyna keltirýge tyrysatyndyqtaryn jetkizdi.

— Bul qalanyń kólik júıesin aıtarlyqtaı jeńildetetin mańyzdy kópir. Sol sebepti 2-3 aıdyń ishinde ony qalpyna keltirýge tyrysamyz, — dedi ákim.

Eske salsaq, osyǵan deıin Óskemende kópir qulaǵany jaıly jazǵanbyz.