Óskemende kópqabatty úıden shyqqan órtten 12 adam qutqaryldy
ÓSKEMEN. QazAqparat - 26 sáýir kúni tańǵy saǵat 08 shamasynda Óskemendegi Serikbaev kóshesinde ornalasqan úıdiń 2-shi qabatyndaǵy páterde órt shyqty. Oqıǵa ornyna ShQO TJD Órt sóndirý bólimsheleri jedel keldi, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.
Birinshi kezekte qutqarýshylar tútin aımaǵynan 12 turǵyndy, onyń ishinde 2 balany evakýatsııalady. Páterde jıhaz ben jeke zattar janǵan. Órt sóndirýshiler 2 sharshy metr alańda otty jedel túrde óshirdi. Órtti sóndirýge jeke quramnan 16 adam jáne 6 tehnıka tartyldy. Páterden órt sóndirýshiler 1970 jyly týǵan er adamdy alyp shyqty, oǵan qutqarýshylar alǵashqy medıtsınalyq kómek kórsetti. Jedel járdem kelgen boıda termııalyq kúıik alǵan zardap shegýshi medıtsınalyq mekemege emdeýge jatqyzý úshin dárigerlerge tapsyryldy.
ShQO TJD Órt sóndirý zertteý synaq zerthanasy mamandarynyń derekteri boıynsha keleńsiz jaǵdaıǵa er adamnyń tósekte temeki shegýi sebep bolǵan.
