Óskemende kópqabatty úıden órt shyǵyp, 15 adam evakýatsııalandy
ÓSKEMEN. QazAqparat. Óskemen qalasynda kópqabatty turǵyn úıden órt shyǵyp, 15 adam evakýatsııalandy, dep habarlaıdy QazAqparat tilshisi.
Shyǵys Qazaqstan oblystyq Tótenshe jaǵdaılar departamenti baspasóz qyzmetiniń málimetine súıensek, búgin Novorabochaıa kóshesindegi turǵyn úıdiń 2-shi qabatyndaǵy páterden órt shyqqan. Qyzyl jalyn esiktiń aǵash qurylymdary men qabyrǵany sharpydy.
«Oqıǵa ornyna jedel jetken qutqarýshylar birinshi kezekte 15 turǵyndy, onyń ishinde 4 balany evakýatsııalady. Kóp uzamaı tilsiz jaý tolyqtaı aýyzdyqtaldy. Órttiń shyǵýyna - elektr jabdyqtaryn paıdalaný jáne montajdaý kezinde órt qaýipsizdigi erejelerin saqtamaý sebep bolǵan», - dep habarlady vedomstvo ókilderi.
Osy rette, departament mamandary óńir jurtshylyǵyna órt qaýipsizdigi talaptaryn buzbaý qajettigin eskertedi. Órt bolǵan jaǵdaıda dereý «101» nemese «112» nómirlerine habarlasý kerek.
